Vom Wechsel der Tapete, dem Mensch sein und wilden Wasserfällen

Lässig sass Marc #tingting im März 2023 auf dem Sofa an einem Ting Geschichten Abend und hat in breitem Berndeutsch die nachfolgende Geschichte vorgetragen. Nun dürfen wir diesen sehr persönlichen Text mit euch teilen. Wir haben diesen unverändert gelassen, haben euch ausschliesslich ergänzende Informationen dazugestellt. Los geht es...

Mini Faszination für d'Naturwüsseschafte hei imne gwinnorientierte Ungernäme je lengers je weniger Platz gha. Zuenähmends hani mi nurno mit Verträg, Prozesse und Regulatorie müesse umeschlah. D'Ussichte als schwiizer Medizintechnik-Hersteller in Europa erfolgriich zwärde si nachem Schiitere vode bilaterale Verträg mit dr EU  immer düschterer worde. 10 Stund vorem Compi jede Tag und dr Blick usem Fänster ane graui Huusmuur hei mir dr Räscht gä. I ha täglech Qi Gong gmacht und meditiert zum e inneri Rueh so guet wi müglech witerhin chönne z kultiviere. 

Di Medizinprodukt wo mir im Rahme vo üsem Startup entwicklet hei si vode Zuelassigsbehörde als wirksam und sicher erklärt worde, u so isch mit dr europäische Markzuelassig im Summer 2020 e grosse Teil vo mire Ufgab als Leiter vor wüsseschaftleche Abteilig z'End gange. Am Tag woni mit dr Isammlig vo de letschte Date di klinischi Studie als offiziell beendet erklärt ha, isch am Abe no mini Tochter Juno ufd Wält cho. Unger Träne hani 3 Täg speter ader Generalversammlig üsne 20 Investore verkündet dasi üsi Bude wirde verlah.

Aber i ha zersch mau e Tapetewächsu brucht u wo im Herbst d'Pandemie richtig het afa azieh, simer mit üsem Bebe i mexikanisch Dschungel abtoucht. Mir hei dert e usgedehnte Retreat buecht, u si mit ere Gruppe vo Artischte, Zirkuslüt und andere Lebenskünstler 4 Mönet im Urwaud gsi. Mir hei über tropischi Permakultur glert, hei tanzet, turnet, gschnuufet und üs e Infusion vo dene göttlech süess-farbige Tropefrücht gönnt. So söt sech Läbe doch eigetlech afüehle!

Total inspiriert vo dem Läbensentwurf simer im Früehlig wider zrügg id Schwiz kehrt u hei entschiide: Soöpis wär doch ir Schwiiz o müglech, soöpis weimer hie ir Schwiiz o abiete. Chum, mir investiere es haubs Jahr vo üsere Zit id Planig vo somne Nature-Retreat. I steue e Atrag bi Ting u de luegemer obsi das Projekt düe understütze. Naturnöch, Gmeinschaft erlebe, Workshops zu Selbstentfaltig, Selbstusdruck, Üebige zu bewusster Sexualität, Bodypaint, Jam Sessions, tanze, Kakao, Schwizhütte und nackt ungerem Wasserfau Bade. Das isch das womer wei, so weimer Läbe. Mir hei agfange üs säuber nöi z erfinde, üs e Name zgä, Werte und e Kultur definiere. Mir hei es Team zämegsteut us Workshop Facilitators, e Location gfunde und wo z'Chuchiteam ungerschribe het heimer gwüsst, iz wirds real! Mir hei afa Deko und Infrastruktur mache, Sitzküssi gnäit, Teppiche gsammlet, Holz-Ligistüel zimmeret und riisegrossi Glampingzelt postet. Mir hei e website gmacht und z'Ticketing für üse erst 2-wöchig Retreat mit Google, Facebook und Instagram online gschaute. Läck het sech das guet agfüeut wo di erste Lüt sech es Ticket für üse «Collective Resonance» Nature-Retreat kouft hei.

U när isch dr Bscheid cho vo Ting das die Witerentwicklig nid wird understütze. Es gäbi scho vili so Agebot, es sigi me e Investition ids Material und nid ine Person, und mir chönne d Chöschte wo entstöh ja über d Teilnehmerbiiträg abdecke. Irgendwie nachevollziehbar. Mir si trotzdem chli entdüscht gsi. Mängisch hani chli afa zwifle ob üses Vorhabe würklech uf Nachfrag wird stosse we sones innovativs Projekt wie Ting findet dases soöpis nid brucht. Irgendwie hani mi chli nackt gfüeut, woni uf dr Website vo Ting under «abgelehnte Projekte» mis Profiu-Foto mit mim sorgfältig usgarbeitete Pitch betrachtet ha. 

Zletscht heimer e fantastische Summer Retreat organisiert u mit knapp 30 Erwachsne, 10 Kind u 10 Helfer 2 Wuche ir Ostschwiizer Natur verbracht. I ha QiGong u Meditatione agleitet, mir hei Yoga gmacht, gschnufet, tanzet wie wiud, Prozessarbeit gmacht, Gmeinschaftstools usprobiert, und ja mir hei üs farbig agmale und underem Wasserfall badet! Mir hei täglech Workshops säuber agleitet, Kind vo üs und vo de Teilnehmende betreut, und jede Tag Chuchischichte gschobe. Sträng gsi wine more. Verdient het niemer öpis und z'Material heimer vo üsem Ersparte zaut. Mir würdes wider mache, aber äuä chli anders.

Chli wehmüetig heimer dä Summer la usklinge und i ha mi gfragt: Und iz? Wie witer? Vo so Nature-Retreats chöimer nid läbe und wider id Medizintechnik zrügg chani mer bim beste Wiue nid vorsteue. Trotz mire Usbildig als Humanbiolog hani zletscht im Bruef verdammt wenig mitem mönschleche Körper ztüe gha, drbi hani e grosse Erfahrigsschatz zu Niche-Theme wie Elektrophysiologie, Neuroimmunologie und Gwebsregeneration woni wet drufufboue u praxisorientiert witervermittle.

I probieres nomau mitemne Atrag bi Ting und luege ob mini Vision vore Witerentwicklig zum medizinische QiGong Kursleiter häufe mittrage.
Grad woni dr Atrag iigreicht ha hani mitübercho das Ting z'Bewertigsverfahre gänderet het, so das iz alli Mitglieder chöi über d'Projektiigabe entscheide. Irgendwie hani o chli Schiss gha nomau ablehnt zwerde. Aber es isch anders cho! Churz vorem Jahreswächsu hani Bscheid übercho dasi ab Summer 2023 mit dr Understützig vo Ting cha rechne und mir so dä Wärdegang zum medizinische QiGong Kursleiter cha ermögleche. 

Merci viumau für ds vertroue, a dere Steu! Im April (23) wirdi zum zwöite mau Vater und ab Juni wirdi hie zBern im Kilefäudquartier imne nöie Health Center medizinisches QiGong unterrichte. 

Lieber Marc 🙏 Wir sind sehr dankbar, dass wir dich #tingting nennen dürfen. Du hast uns mit deiner Offenheit viel mitgegeben. Unter anderem, dass Vertrauen, Empathie und intrinsische Motivation unbezahlbare Kräfte sind.